(NI BETH JULIAN)

UMAPELA ang Malacanang sa mga kandidato mula sa iba’t ibang partido na panatilihing maging tapat, maayos, mapayapa at kapani-paniwala ang halalan sa bansa ngayong Mayo 13.

Kasabay nito, hinikayat din ng Malacanang ang mga botante na  makiisa at gamitin ang karapatan na iluklok ang nararapat na manungkulan para sa ikabubuti ng kanilang lugar at ng bansa.

“Nananawagan kami sa lahat ng Filipino na may karapatang bumoto na pairalin ang kanilang kapangyarihan na mag-participate in this healthy democratic exercise as we call on all candidates across the political spectrum to ask their supporters to observe an honest, orderly, peaceful and credible elections reflective of the people’s genuine will,” pahayag ni Presidential spokesperson Salvador Panelo.

Ayon kay Panelo, nakahanda na sa halalan ang may 36,000 eskuwelahan para gamitin bilang polling precincts at may 230,000 guro naman ang tatayo bilang  electoral boards at technical support para sa halalan sa Lunes.

Naglunsad na rin ang PNP ng National Election Monitoring Action Center upang i-monitor ang sitwasyon ng lahat ng  polling centers mula Camp Crame, kabilang na ang pagdating ng vote counting machines (VCMs), pagbibilang ng balota at pagdi-deliver ng mga  ballot boxes.